Það er sem sagt komið að því að þessi yndislegi maður, barnsfaðir minn og besti vinur, ætlar að skila mér,“ segir Camilla Rut Rúnarsdóttir, einn vinsælasti áhrifavaldur landsins.
Fréttirnar komu fylgjendum hennar virkilega á óvart þar sem hún segir frá skilnaðinum með afar persónulegri tilkynningu. Fylgjendur hafa áttað sig strax hvað væri í vændum því ásamt henni var eiginmaður hennar Rafn Hlíðkvist Björgvinsson sem gerist ekki á hverjum degi.
„Við erum að setja hamingju okkar og barnanna okkar í forgang og okkur þykir þetta vera það skynsamlegasta í stöðunni,“ segir Camilla Rut ennfremur.
Parið hefur verið saman í 13 ár og eiga þau tvö börn saman. Segir Camilla Rut að þau hafi byrjað saman sem bestu vinir og hætti saman sem bestu vinir.
Þau deila því svo með fylgjendum Camillu Rutar að langur aðdragandi hafi verið að þessari tilkynningu og að þau hafi farið í gegnum allskonar tilfinningar, upp og niður.
Parið segist ætla að vinna úr skilnaðinum í rólegheitunum. Yfirvofandi sé heimsókn fasteignasala og mörgu öðru sé að hyggja. Þau séu sammála um að það sé léttir að hafa tekið þessa ákvörðun í sameiningu en vissulega séu tímamótin einnig erfið. Þau hafi einfaldlega vaxið í sundur.
„Það eina sem við biðjum um er mildi,“ segir Camilla Rut og Rafn tekur heilshugar undir það. Þá segir Camilla Rut að viðbúið sé að efnið hennar á Instagram-síðunni muni taka u-beygju. „Búið ykkur undir single-mom content,“ segir hún og hlær.