Fylgi Katrínar Jakobsdóttur, fyrrverandi forsætisráðherra, er í frjálsu falli ef marka má nýja könnun Prósents sem birtist í morgun. Eftir að hafa mælst með rúmlega 30 prósenta fylgi er hún komin niður í 18 prósenta fylgi og er lægst þeirra fjögurra sem mælast vera með mest fylgi.
Í könnun Prósents fyrir viku var Katrín með 29 prósenta fylgi. Aðeins Jón Gnarr mælist með minna fylgi. Hann er með 16 prósent og ekki marktækur munur á þeim tveimur. Halla Hrund Logadóttir orkumálastjóri er aftur á móti efst í könnuninni með tæplega 29 prósenta fylgi og hefur tekið afgerandi forystu.
Morgunblaðið birti könnunina sem gefur til kynna að Baldur Þórhallsson prófessor verði í öðru sæti í kapphlaupinu. Háflug Höllu Hrundar gefur til kynna að þjóðin kunni að hafna því að stjórnmálamaður setjist í embætti forseta Íslands. Halla Hrund er sú eina af fjórmenningunum sem hefur ekki tekið þátt í pólitík. Hinir þrír hafa allir markað spor sín á þeim vettvangi.
Könnunin er mikið áfall fyrir stuðningsmenn Katrínar sem höfðu vænst þess að hún myndi stefna þráðbeint til Bessastaða á sigurbraut. Nú er allt annað uppi á teningnum. Nú er þess beðið með eftirvæntingu hvernig næsta könnun Gallup komi út en sú mæling þykir vera hvað marktækust …