Bjarni Benediktsson utanríkiráðherra á ekki sjö dagana sæla eftir að hann skipaði Svanhildi Hólm Valsdóttur, fyrrverandi aðstoðarmann sinn, sem sendiherra í Washington. Fæstir botna í þessu ráðslagi Bjarna sem metur Svanhildi framar öllum öðrum til að sitja þennan mikilvægasta sendiherrapóst Íslands. En þó eru einhverjir sem standa með Bjarna og sýna því skilning að hann gauki góðu að nánustu samstarfsmönnum og fjölskyldu. Þeirra á meðal er Þórdís Kolbrún Reykfjörð Gylfadóttir, fjármálaráðherra og einn helsti kandídat Bjarna sem arftaki í flokknum. Hún segir aðstoðarmannstarf Svanhildar vera vanmetið en þaðan hafi hún fengið góðan grunn til þess að verða sendiherra. Hún bendir á í viðtali við Ólaf Arnarson í Hlaðvarpi Eyjunnar að aðstoðarmenn séu einskonar bastarðar í kerfinu og verðskuldi þá væntanlega meiri upphafningu.
Margir gleðjast einnig fyrir hönd Loga Bergmanns Eiðssonar, fyrrverandi fjölmiðlamanns og eiginmanns Svanhildar, sem missti vinnu sína og hefur verið á hrakhólum eftir uppljóstranir Vítalíu Lazareva á sínum tíma. Vítalía hefur dregið í land með ásakanir sínar á hendur sjónvarpsmanninum en Logi situr eftir með ímyndarskell. Hans bíður nú trygg afkoma og góðir dagar á friðarstóli í Washington með spúsu sinni …