Æsispennandi kosningabarátta er að hefjast eftir morgundaginn þegar fyrir liggur hverjir ná því lágmarki meðmælenda sem krafist er. Þegar Katrín Jakobsdóttir, sagði af sér embætti forsætisráðherra, voru taldar yfirgnæfandi líkur á því að hún myndi auðveldlega hreppa embættið. En róðurinn reynist þyngri. Baldur Þórhallsson prófessor var kominn á fleygiferð og reyndist standa Katrínu framar í kapphlaupinu í upphafi.
Katrín hefur fengið á sig vaxandi gagnrýni fyrir að rétta Bjarna Benediktssyni forsætisráðuneytið og halda þannig áfram að ganga undir Sjálfstæðisflokknum. Nýjasta gagnrýnin beinist að þætti Katrínar í að rétta norskum fiskeldiskóngum auðlind þjóðarinnar.
Barátta Katrínar til að ná Bessastöðum þykir um margt minna á þann slag þegar Gunnar Thoroddsen, einn æðsti ráðamaður Sjálfstæðisflokksins og tengdasonur forseta Íslands, ætlaði sér að verða forseti með stuðningi Sjálfstæðisflokksins. Flokkurinn fylkti sér að baki hans en allt kom fyrir ekki. Þjóðminjavörðurinn háttprúði, Kristján Eldjárn, gerði sér lítið fyrir og lagði hinn smurða. Gunnar er frændi Katrínar.
Örlög Katrínar gætu orðið þau að þurfa að lúta í gras fyrir minni spámönnum. Það er þó öldungis óvíst að það verði Baldur sem skákar henni. Allt eins er líklegt að nýstirnið Halla Hrund Logadóttir eigi eftir að taka sviðið og vinna Bessastaði. Katrín situr uppi með pólitíkina sem eltir hana uppi eins og kolsvartur skuggi, rétt eins og frænda forðum …