Stefán E. Stefánsson, blaðamaður Moggans, hefur lagt upp í herferð gegn öllum þeim sem tengja saman starf hans og störf eiginkonu hans, Söru Lindar Guðbergsdóttir, settan orkumálstjóra. Alkunna er að Mogginn birti upplýsingar úr bókhaldi Orkustofnnunar sem áttu að sýna fram á spillingu og vinavæðingu forsetaframbjóðandans Höllu Hrundar Logadóttur.
Kristín Helga Gunnarsdóttir rithöfundur náði að espa blaðamanninn svo um munar með því að tengja saman þau hjón vegna umfjöllunar Moggans um Höllu Hrund sem hún kenndi að hluta við ósiðlega lægð í íslenskri blaðamennsku. Stefán hjólar í Kristínu, sem nýtur virðingar og aðdáunar fyrir bækur sínar, og bendir á að hún sé að hluta til á framfæri skattgreiðanda.
„Rétt og siðlegt finnst henni að blanda konunni minni inn í málið og níða af henni skóinn – bara svona í kaupbæti. Þetta er manneskja sem gefur sig út fyrir að skrifa og gefa út barna- og unglingabækur. Reyndar á minn kostnað og annarra skattgreiðenda sem fáum ekkert að segja um þann fjáraustur sem engu skilar til samfélagsins,“ segir Stefán í færslu sinni á Facebook.
Blaðamaðurinn gleymir í glósu sinni að hann er sjálfur á framfæri skattborgara sem leggja fjölmiðli hans til rúmlega 70 milljónir króna á ári í fjölmiðlastyrk. Þannig standa skattborgarar undir launum hans ekki síður en launum rithöfunda. Þess utan er Stefán á framfæri Guðbjargar Matthíasdóttur, umdeildrar auðkonu í Vestmannaeyjum, sem hefur haldið Mogganum í botnlausu tapi á floti með framlögum sem teljast í milljörðum króna.
Kveinstafir Stefáns lýsa í besta falli tvöföldu siðferði. Faðirvorinu snúið upp á skrattann, enn og aftur …