Samkvæmt Austurfrétt var borað niður á 800 metra dýpi en þrátt fyrir dýptina fannst ekki heitavatnsæðin sem leitað var frá byrjun. Þá öllu hitamælingar á þessu dýpi vonbrigðum en óljóst er hvort og þá hvenær tilraun verði gerð aftur til að bora eftir heitu vatni á svæðinu, enda er Trölli, jarðborinn sem notaður var, farinn frá Djúpavogi í önnur verkefni.
Miklar vonir voru bundnar við borunina enda gáfu mælingar á svæðinu til kynna að þar mætti finna vatnsæð með nægu vatni. Fram kemur hjá Austurfrétt að mögulegt sé að ekki hafi tekist að skera á þessa æð í boruninni en blástur á holunni leiddi ekkert í ljós heldur. Blástur sem þessi getur hreinsað æðar sem mögulega hafa stíflast af drullu.
Hef-Veitur kortleggja nú næstu skref en talsverður tími mun líða þar til prófað verður aftur að bora á svæðinu, verði það ákveðið vegna þess að verkefnastaða bora sem til þarf er gríðarlega löng, að því er fram kemur í umfjöllun Austurfréttar.