Ekki láta hvers kyns andstreymi buga þig

Hljómsveitin Skepna var að senda frá sér lagið Láttu ekki Helvítin ná þér. Lagið er fyrsta smáskífan af annarri plötu sveitarinnar, Dagar heiftar og heimsku, sem kemur út í dag, 17. maí, á streymisveitum og geisladiski og 1. júní á vínyl.

Skepna er kraftmikið tríó skipað jöxlum úr rokkbransanum. Hallur Ingólfsson spilar á gítar og syngur, Hörður Ingi Stefánsson spilar á bassa og Björn Stefánsson spilar á trommur. Bandið er þekkt fyrir beinskeytta og gagnrýna texta og á plötunni skoðar Skepna með sínum augum samtímann, meðal annars ofbeldi, einelti, allsnægtir, nútímagoðsagnir, firringu, lýðskrum, svik, minnisglöp og karlmennsku, svo fátt eitt sé nefnt.

„Láttu ekki Helvítin ná þér, er hvatning til þess að láta ekki hvers kyns andstreymi buga sig,“ segja liðsmenn sveitarinnar. „En helvíti geta birst í mörgum myndum hvort sem það eru aðstæður, umhverfi eða jafnvel eigin hugsanir.“

Upptaka og hljóðblöndun var í höndum Halls Ingólfssonar en hljómjöfnun annaðist S. Husky Hoskulds í Groundlift-hljóðverinu í Los Angeles. Þetta er önnur plata Skepnu en áður kom út plata samnefnd sveitinni árið 2013.

Ekki missa af þessum

Annað áhugavert efni