Nokkrir tónlistarviðburðir fara fram um helgina og hér eru fjórir sem vert er að kíkja á.
B1B2 á Röntgen
Dj-dúóið B1B2 spilar á skemmtistaðnum Röntgen í kvöld, föstudaginn 20. desember. Þar mun tvíeykið spila „afro-house“ og ethno-teknó sem leikur á öll skynfærin. Enginn aðgangseyrir er á viðburðinn, sem hefst klukkan 23.
Jólatryllingur á Hressingarskálanum
Í kvöld, föstudaginn 20. desember, verður jólatryllingur á Hressingarskálanum. Fram koma: Teitur Magnússon, Pale Moon, Quest og Kraftgalli. Fjörið hefst klukkan 20 og er ókeypis inn.
Una Torfadóttir á Loft
Una Torfadóttir treður upp á skemmtistaðnum Loft 22. desember. Una, sem er 19 ára lagasmiður og söngkona, hefur vakið athygli fyrir lög sín en þau einkennast af einföldum laglínum og persónulegum og hnyttnum textum. Una kemur ein fram á tónleikunum, en auk þess að syngja spilar hún á gítar og aldrei að vita nema hún taki líka nokkur jólalög. Enginn aðgangseyrir er á tónleikana sem hefjast klukkan 20.
Stebbi Jak og Andri Ívars í Hlégarði
Annað kvöld, laugardaginn 21. desember munu félagarnir Stefán Jakobsson Dimmusöngvari og Andri Ívarsson gítarleikari halda tónleika í Hlégarði í Mosfellsbæ. Þar ætla félagarnir að flytja „öll bestu jólalög í heimi“ í tilþrifamiklum „acoustic“-útsetningum og segja aulabrandara inn á milli. Fjörið hefst klukkan 21. Hægt er að nálgast miða á midi.is