11 ára stúlka lést eftir fuglaflensusmit í Kambódíu. Var þetta fyrsta skráða tilfelli flensunnar þar í landi síðan 2014. Stúlkan var greind á miðvikudaginn í síðustu viku þegar hún fékk háan hita, hósta og hálsbólgu en hún lést fljótlega í kjölfarið. Tekið var sýni úr dauðum fugli sem fannst fyrir utan heimili stúlkunnar en heilbrigðisráðherra Kambódíu, Mam Bunheng, varaði við aukinni hættu á smiti á meðal barna sem leika sér að fuglahræum eða eru að öðru leiti í návígi við fugla. Íbúar landsins eru varaðir við því að snerta dauða eða veika fugla.
Einkenni fuglaflensunnar eru svipuð þeim sem fylgja hefðbundnum flensum, hiti, hósti og hálsbólga. Í alvarlegum tilfellum geta sjúklingar þróað með sér lífshættulega lungnabólgu. Þessi tiltekna veira hefur fundist hjá um 870 manns í 21 landi, 457 dauðsföll hafa orðið vegna hennar.
Fyrr í mánuðinum gaf Alþjóðarheilbrigðismálastofnunin út tilkynningu þar sem sagt var að enn væri talin lítil hætta á að veiran smitist á milli fugla og manna. Ekki er þó hægt að útiloka að sú staða breytist og er fólk hvatt til þess að hafa varann á.