Í Húsgagnahöllinni var auglýst borð á 59990 krónur þann 15. nóvember en er núna, hálfum öðrum mánuði síðar, er borðið sagt vera á útsölu á 59992 krónur. Fullyrt er að það sé með 20 prósenta afslætti. Upplýst er að borðið hefði áður kostað 74990 krónur. Guðrún nokkur vekur athyli á þessu inn á grúppunni Vertu á verði á Facebook.
Mannlíf óskaði eftir viðbrögðum hjá Húsgagnahöllinni og fékk neðangreind svör frá Vigfúsi Blæ Ingasyni verslunarstjóra:
„Þetta er ný vara sem fór á heimasíðuna hjá okkur áður en varan kom. Þar var áætlað verð á borðinu 59.990,-. Borðið kom svo 15. nóvember. Þegar vörurnar koma til landsins sjáum við nákvæmt innkaupaverð á vörunni ásamt öllum flutningstengdum gjöldum. 15.nóvember sjáum við að borðið var vitlaust verðlagt hjá okkur og við löguðum verðið þann dag. Borðið er í raun búið að vera á 74.990,- frá því að það kom til okkar 15. nóvember.
Ég biðst afsökunar á misvísandi skilaboðum. Við erum að reyna eins og við getum að sýna á heimasíðunni þær vörur sem eru væntanlegar til okkar en það getur verið erfitt með nýjar vörur þar sem rétt innkaupaverð kemur ekki fyrr en varan er komin til okkar“.