Munur á skoðunargjaldi dýralæknastofa á höfuðborgarsvæðinu er 3.790,-krónur. Dýralæknastofa Reykjavíkur býður lægsta skoðunargjaldið eða alls 7.200,- krónur en Dýraspítalinn í Garðabæ innheimtir 10.990,- krónur.
Mesti munur á verði fyrir sambærilega aðgerð þar sem allt er innifalið er 36.000,- fyrir tannhreinsun á ketti. Ódýrust er aðgerðin hjá Dýralæknastofu Dagfinns á 17.500,- krónur en dýrust hjá Dýraspítalanum Garðabæ á 53.000.- krónur.
Dýralæknastofa Dagfinns og Dýraspítalinn Víðidal bjóða sambærileg verð og jafnframt hagstæðustu uppgefnu verðin á heildina litið en allar dýralæknastofurnar setja fyrirvara um að hvert tilfelli sé ólíkt og verðin því aðeins leiðbeinandi.
Mismunandi er hvort dýralæknastofurnar gefi upp verð með eða án lyfja- og efniskostnaðar og því þarf einnig að huga að því þegar verðsamanburður er gerður.
Uppgefin verð á útköllum eru sambærileg, eða 33.000,- til 35.000,- krónur. Hinsvegar er mikill munur á álagi vegna útkalla á næturnar, stórhátíða, aðgerða og aðstoðarfólks og getur slíkt álag verið allt að 100%.
Verðmunurinn getur reynst töluverður og því er hyggilegt fyrir gæludýraeigendur að gera verðsamanburð með tilliti til þeirra dýra hverju sinni.