Björk Eiðsdóttir, blaðamaður Fréttablaðsins, tók á dögunum umdeilt forsíðuviðtal við Önnu Dóru Sæþórsdóttur, fyrrverandi forseta Ferðafélags Íslands, sem sagði af sér með miklum látum nokkru eftir að hafa verið formlega ásökuð um einelti gegn Páli Guðmundssyni framkvæmdastjóra.
Anna Dóra hafði gert samkomulag um að víkja úr embætti án stórra yfirlýsinga, gegn því að fallið yrði frá eineltiskærunni. Eineltiskæran var blásin af og Anna Dóra ætlaði að stíga til hlaðar og fullkomna sáttina. En það gerðist ekki.
Anna Dóra var í viðtali við Stundina fyrir ári síðan þar sem hún lýsti því að öll mál sem kvartað hafði verið yfir voru leyst og hún yrði að gæta trúnaðar varðandi einstök mál.
„Við getum ekki tjáð okkur um málefni einstakra starfsmanna/stjórnarmanna en viljum þó segja að öll þau mál sem upp hafa komið hjá Ferðafélaginu sem varða þennan málaflokk hafa verið meðhöndluð í samræmi við viðbragðsáætlun félagsins,“ sagði Anna Dóra í nóvember í fyrra.
Ári seinna birti hún nöfn fararstjóra og stjórnarmanna sem hún gaf til kynna að hefðu brotið alvarlega af sér í skjóli stjórnar og framkvæmdastjórnar og var ósátt við meðhöndlun þeirra mála. Viðtal Fréttablaðsins við hana þótti vera með miklum endemum, hlaðið rangfærslum og beinum rógi auk trúnaðarbrota gegn félaginu. Nokkrir félagsmanna Ferðafélagsins hafa fordæmt skrif Bjarkar sem er sökuð um að bera á torg mál sem höfðu öll verið útkljáð með sátt. Anna Dóra var ekki spurð um eineltismálið á hendur henni. Þá var hún ekki spurð um þá tilraun sem hún, Róbert Marshall fararstjóri og félagar hennar gerðu til hallarbyltingar í félaginu.
Á fjölmennum fundi Ferðafélagsins á fimmtudagskvöld kom fram í máli fundarmanns að eftir að hafa lesið viðtalið í Fréttablaðinu hefðu augu hans beinlínis opnast fyrir þeirri herferð sem Anna Dóra stæði í gegn sínu gamla félags. Yfirgnæfandi fjöldi fundarmanna samþykkti á einum allra fjölmennasta fundi í sögu Ferðafélagsins að lýsa fullu trausti á sitjandi stjórn og framkvæmdastjóra. Óljóst er hvernig Sigmundur Ernir Rúnarsson ritstjóri mun taka á málinu og hvort rangfærslurnar verða hraktar …