Björn er viss í sinni sök og hikar ekkert: „Rek­um rúss­neska sendi­herr­ann“

„Það væri verðugt að minn­ast eins árs af­mæl­is stríðs Rússa með því að skipa sendi­herr­an­um að yf­ir­gefa Ísland. Hlut­verk hans er ekki að virða full­veldi Íslands held­ur að grafa und­an því og friði í okk­ar heims­hluta,“ segir skrif­ar Björn Bjarna­son, fyrr­ver­andi dóms- og kirkju­málaráðherra, á vefsíðu sinni bjorn.is:

Færsl­an ber yfirskriftina „Rek­um rúss­neska sendi­herr­ann.“

Þar nefnir ráðherrann fyrrverandi að hér á landi heyr­ist „hvorki hósti né stuna“ frá ís­lensk­um stjórn­völd­um þótt Mik­haíl Noskov, sendi­herra Rúss­lands á Íslandi, fari móðgandi orðum um ut­an­rík­is­ráðherra Íslands og rægi ís­lenskt sam­fé­lag í rúss­nesk­um fjöl­miðlum.

Björn tiltekur að Rúss­land okk­ar daga sé lokaðra land en Sov­ét­rík­in sál­ugu voru á sín­um tíma. Segir hann það vera vegna „sér­stakr­ar aðgerðar“ inn­rás­arliðs Moskvu­valds­ins í Úkraínu.

Telur hann að íbúar Rúss­lands búi við sí­fellt meiri harðstjórn og minnk­andi sam­skipti við er­lend ríki.

Björn telur að Mikhaíl Noskov sendiherra fái hrós frá Kreml fyrir frammistöðu sína að verja árás Rússa í Úkraínu:

„Er ekki að efa að fyr­ir þetta fær hann nokkr­ar stjörn­ur í kladda sinn í Kreml og hjá njósn­ur­un­um þar.“