Óskað var eftir aðstoð lögreglu á veitingastað í Hlíðunum í gærkvöldi vegna manns sem var ofurölvi. Maðurinn hafði pantað sér veitingar en þegar kom að því að borga gat hann ekki greitt fyrir veitingarnar. Þegar lögregla kom á vettvang var maðurinn sofandi ölvnarsvefni og hafði misst þvag. Maðurinn var handtekinn og sökum ástands var hann látinn gista í fangaklefa.
Síðar um kvöldið barst lögreglu tilkynning um ofurölvi mann sem gekk berserksgang á bensinstöð í Árbænum. Maðurinn hafði verið öskrandi og óganandi inn á bensínstöðinni auk þess að hafa slegið í glerafgreiðsluborð svo það brotnaði upp úr því. Maðurinn hafði síðan farið af vettvangi en sneri aftur nokkrum klukkustundum síðar, ógnaði starfsmanni og veittist að honum. Lögregla handtók manninn sem er einnig grunaður um þjófnað. Í sama hverfi hafði lögregla afskipti af manni sem svaf ölvunarsvefni utandyra. Maðurinn var með áverka á andliti og var sjúkrabíll sendur á vettvang til þess að athuga með ástand hans. Að því loknu var hann færður í fangaklefa, sökum ástands. Þá sinnti lögregla umferðareftirliti og öðrum málum, meðal annars innbroti.