Þrátt fyrir erfiða tíð vegna Covid 19 hagnaðist Costco á Íslandi um 463 milljónir króna á rekstrarárinu sem lauk í ágúst 2020; félagið hagnaðist um 417 milljónir eftir skatta árið áður, samkvæmt ársreikningi. Varðandi rekstrarhagnað félagsins þá nam hann 113 milljónum króna en var 152,4 milljónir árinu áður.
Aukning á sölu Costco hérlendis jókst um 3,7% frá fyrra ári og nam 20,5 milljörðum króna. Stjórnendur eru ánægðir:
„Líkt og mörg önnur fyrirtæki á Íslandi hefur Covid-19 haft töluverð áhrif á rekstur Costco og sérstaklega á seinni helming tímabilsins. Vegna þeirrar takmarkana sem voru innleiddar til að hindra útbreiðslu veirunnar varð talsverð lækkun í sölu á bensíni og ferðatengdum vörum vegna takmarkana á ferðalögum fólks og minni veitingasölu sem var takmörkuð að því leyti að viðskiptavinir máttu ekki setjast niður á svæðinu og borða þar.
Þessar lækkanir voru hins vegar bættar upp með meiri sölu á matvöru og öðrum vöruflokkum þegar viðskiptavinir okkar höfðu aðlagað sig að aðstæðum. Við sáum jafnframt mikla aukningu á sölu sótthreinsiefna, andlitsgríma og lyfja,“ eins og segir í skýrslu stjórnar.
Heimild: vb.is