Píratinn Einar Brynjólfsson segir að „skoðanakannanir Gallup benda til þess að Píratar endurheimti þingsæti sitt í Norðausturkjördæmi í komandi Alþingiskosningum,“ og að „það yrði vitanlega ánægjulegt fyrir Pírata, en það er líka áhugavert að skoða hver gæti hreppt jöfnunarþingsæti kjördæmisins; svona í ljósi þess hve mikilvæg jöfnunarþingsætin eru í sambandi við hlutfall milli þingsæta og heildarfjölda atkvæða hvers flokks. Samkvæmt útreikningum kæmi þetta þingsæti í hlut Sósíalistaflokksins.“
Einar bendir á galla í kosningakerfinu hér á landi:
„Undanfarna daga hafa verið fluttar fréttir af því að vegna galla á kosningakerfinu – það er vegna of fárra jöfnunarþingsæta – sé hugsanlegt að einhverjir flokkar fái fleiri þingmenn við kosningarnar í haust en þeim ber í raun og veru. Einhverjir flokkar muni að sama skapi fá færri þingmenn en þeir hefðu átt að fá.“
Einar segir að „þessi skekkja er engin nýlunda, en í gegnum tíðina hefur hvað eftir annað komið upp sú staða að tilteknir stjórnmálaflokkar hafi fengið færri þingmenn en aðrir, þrátt fyrir meiri heildarfjölda atkvæða. Með öðrum orðum: Sumir flokkar hafa haft einn og einn þingmann af öðrum flokkum vegna kerfisgalla.“
Að mati Einars mætti laga „þennan vanda með því að fjölga jöfnunarþingsætum verulega. Það þarf enga breytingu á stjórnarskrá eða umbyltingu kosningakerfisins í heild sinni. Einföld breyting á kosningalögum, líkt og sú sem núverandi þingflokkur Pírata gerði tillögu um á alþingi í febrúar á þessu ári, leysir úr þessu. Með henni verður tryggt að enginn flokkur fær fleiri þingmenn en atkvæðafjöldi segir til um.“
Og bætir við:
„Það er skemmst frá því að segja að þessi breytingartillaga Pírata var „svæfð“ í nefnd eftir að mælt hafði verið fyrir henni í þingsal. Það er stórundarlegt að ekki hafi verið áhugi til staðar hjá stjórnarmeirihlutanum á því að leiðrétta þessa augljósu skekkju. Eftir stendur spurningin: Hvaða flokkur „stelur“ þingsæti af hverjum við alþingiskosningarnar í haust?“