Það var nokkuð rólegt á höfuðborgarsvæðinu í nótt ef marka má dagbók lögreglu. Tveir ökumenn voru stöðvaðir, báðir grunaðir um akstur undir áhrifum áfengis. Mennirnir voru látnir lausir eftir sýnatöku. Auk þess sinnti lögregla útköllum vegna hávaðakvartana og annarra minniháttar mála.
Í gærmorgun var ekið á 8 ára dreng í Hlíðunum. Drengurinn var að fara yfir gangbraut á hjóli þegar ekið var á hann með þeim afleiðingum að hann féll í götuna. Hann fann til eymsla í hné og sjúkralið leit á drenginn sem var nokkuð brattur. Foreldrunum var kynnt atvikið og afi drengsins kom og sótti hann. Sem betur fer var hraði bifreiðarinnar mjög lítill. Skömmu síðar í sama hverfi var ekið á hjólreiðamann. Sá kvartaði unan verk í baki og herðablaði og var fluttur á bráðadeild til aðhlynningar. Brotist var inn í hús í hverfi 108 í gærmorgun. Búið var að brjóta rúðu og inni í íbúðinni voru maður og kona sofandi. Aðilarnir sögðust vera þarna með leyfi húsráðanda sem er á spítala en voru þau kærð fyrir húsbrot og eignaspjöll.