„Það eru sterkar vísbendingar um að þarna sé fuglaflensa,“ segir Brigitte Brudder, dýralæknir hjá Matvælastofnun, um fjölda dauðra fugla á Reykjanesskaga.
Mannlíf taldi tuga dauðra fugla á litlu svæði í fjörunni við Njarðvík. Mest var um súlur. Sumir fuglarnir eru rotnandi með tilheyrandi fnyk. Brigitte segir að svo rammt kveði að þessu að starfsmanni sveitarfélaganna á svæðinu hafi verið falið að safna saman hræjum og urða þau. Aðspurð um smithættu segir hún að fólk sé ekki í hættu.
„Það eru einungs tvö dæmi um væg veikindi í Evrópu. Þar var um að ræða fólk sem umgekkst sýkta fugla,“ segir Brigette.
Hún segir vandann hérlendis vera þann að heilbrigði villtra fugla heyri ekki undir neinn sérstakan. Matvælastofnun eigi ekki að sinna villtum dýrum en geri það þar sem enginn annar sinni málaflokknum.