Eins og kunnugt er bar úkraínska sveitin Kalush Orchestra sigur af hólmi í söngvakeppni evrópskra sjónvarpsstöðva sem fram fór í Tórínó á Ítalíu í gær.
Volodymyr Zelensky Úkraínuforseti lýsti því eftir sigur Úkraínu í Eurovision að hann vilji halda keppnina í úkraínsku hafnarborginni Mariupol að ári.
Undir venjulegum kringumstæðum mundi það þýða að keppnin fari fram í Úkraínu á næsta ári. Kringumstæður eru þó allt annað en venjulegar í Úkraínu um þessar mundir en Zelensky lætur engan bilbug á sér finna.
„Hugrekki okkar vekur aðdáun umheimsins, tónlistin okkar leggur Evrópu að fótum sér. Næsta ár verður Úkraína gestgjafi Eurovision,“ skrifar forsetinn í færslu á samfélagsmiðlinum Telegram, og bætir því við að hann vilji halda keppnina í Mariupol, sem er rústir einar eftir linnulausar árásir Rússa síðustu vikur og mánuði.