Fréttablaðið hefur misst nær helming lesenda sinna eftir að aldreifingu þess var hætt um áramót. Næstum helmingur lesenda blaðsins er horfinn, samkvæmt mælingum Gallup.
Í desember lásu 28.2 prósent þjóðarinnar blaðið að einhverju leyti. Í byrjun febrúar er staðan sú að einungis 15,7 prósent sjá blaðið. Þetta telst vera áfall fyrir útgefendur blaðsins og þá ekki síst í því ljósi að Morgunblaðið er komið yfir í lestri í fyrsta sinn frá því Fréttablaðið hóf göngu sína. Að vísu munar aðeins tveimur prósentustigum en Mogginn er með 17,3 prósent lestur. Ekki er að sjá að Morgunblaðið hagnist mikið á falli Fréttablaðsins því lestur þess hækkar um innan við 2 prósentustig. Fréttablaðið hefur kynnt sig sem „Mest lesna dagblað landsins“. Það slagorð er fallið úr gildi og útgáfunni ekki heimild að nota það lengur í auglýsingum.
Fyrst eftir að aldreifingu Fréttablaðsins var hætt stökk lestur á vef blaðsins upp og mældist vera 111 þúsund á dag. Sú hækkun hefur gengið til baka að miklu leyti og er lesturinn nú um 100 þúsund á dag.
Hvarf Fréttablaðsins af markaði er stórt skref í þeirri þróun að pappírsmiðlar eru á stöðugu undanhaldi og vefmiðlar hafa tekið sviðið.
Ekki náðist í Sigmund Erni Rúnarsson, ritstjóra Fréttablaðsins, við vinnslu fréttarinnar.