Fuglaflensa staðfest í rauðrefum: „Óeðlilega lítið af yrðlingum á Hornströndum í ár“

Nátt­úru­fræði­stofnun Íslands hefur ekki enn borist hræ frá yrð­lingi til að stað­festa hvort hann hafi fallið af fuglaflensu. Stofn­unin sér um taka sýni úr dauðum íslenskum refum og rann­saka. Í sam­tali við Esteri Rut Unn­steins­dóttur, líf­fræð­ing hjá Nátt­úru­fræði­stofnun Íslands, stað­festir hún að þau Jón Helgason hafa verið í sam­skiptum vegna fjölda dauðra yrð­linga vestur á Horn­bjargi.

Aðspurð hvort hún telji lík­legt að um fuglaflensusmit sé um að ræða svarar hún: „Ég get engu svarað um það, en þessir yrð­lingar úr þessu goti hafa verið með lík­am­lega áverka.“ og bætir við að ekki sé úti­lokað að þeir hafi verið drepnir af öðru dýri.

Aðspurð hvort óeðli­leg afföll hafi verið í refa­stofn­inum í ár svarar hún: „Það var óeðli­lega lítið af yrð­lingum á Horn­ströndum í ár, en öll dýrin virt­ust heil­brigð og við sáum enga veika fugla. Svo ekk­ert stað­festi það að við þyrftum að bregð­ast við út af fuglaflensu.“

Staðfest fuglaflensusmit í rauðrefum

Nátt­úru­fræði­stofnun Íslands sendi á veiði­menn um land allt skýrslu og beiðni þess efnis að senda stofn­unni hræ af dýrum sem fallið hafa til við grenja­vinnslu svo hægt væri að taka sýni fyrir skönnun. Upp­lýs­ingar og greinar erlendis frá hafa sýnt að rán­dýr sem hafa étið veika fugla smit­ist af flens­unni, og má þar á meðal nefna rauðrefi – og yrð­lingar hafa drep­ist. Ester útskýrir að lítið hefur nást að rann­saka málið hér­lendis þar sem yrð­lingar fæð­ast að vori um svipað leyti og far­fugl­arnir komi. „En við höfum ekki heyrt um neitt alvar­legt atvik sem vakti miklar grun­semdir hér,“ bætir Ester við.

Ekki liggja nákvæmar upp­lýs­ingar um hvort spen­dýr sem smit­ist af flens­unni geti smitað önnur spen­dýr, en gefið hefur verið út að þessi stofn af veirunni sé sér­stak­lega smit­andi. „Það sást einmitt af fréttum hér­lendis að súlan var mjög útsett fyrir þessu. Það er fugl sem er í mjög þéttu varpi,“ útskýrir Ester.

Íslenski refastofninn

Íslenski refa­stofn­inn hefur verið í hámarki í mörg ár og telur um það bil 9.000 dýr og er stærsti stofn­inn í Evrópu að Rúss­landi utan­töldu. Stofninn hér telur 90 pró­sent af öllum stofn­inum í Norð­ur­lönd­unum. „Við eigum okkar sterka stofn sem þó getur verið við­kvæmur fyrir utan­að­kom­andi sýk­ingum, eins og algengt er með stað­bundna stofna.“