Guðmundur Felix Grétarsson er gangandi kraftaverk og af honum berast reglulega stórkostlegar fréttir. Tíðindi dagsins eru sundtök kappans í sjónum þar sem hann er í sumarleyfi við strendur Frakklands. Þar svamlar hann með nýju handleggjunum sínum í svalandi öldunum.
Eins og flestir líklegast vita voru græddir á Guðmund nýir handleggir þann 14. janúar síðastliðinn, eftir að hann missti þá báða í hræðilegu slysi árið 1998, þá 26 ára gamall:
Sjá einnig: Guðmundur Felix með frábærar fréttir: „Ég get hreyft þennan skratta“
„Ég vann sem rafveituvirki hjá Rafmagnsveitu Reykjavíkur og var að vinna við háspennulínu rétt utan við borgarmörkin. Röð af atvikum og misskilningi verður til þess að ég fer upp í ranga línu og í raun og veru brenni af mér hendurnar,“ sagði Guðmundur í viðtali við Stöð 2 fyrir nokkrum árum síðan.
Var það í raun kraftaverk að Guðmundur skyldi lifa slysið af, en hann fékk í sig ellefu þúsund volt og var haldið sofandi í sjö vikur.
Sjá einnig: Guðmundur Felix vill sjá gosið og safna hrauni um jólin: „Verð farinn að heilsa með handabandi“
Nú rúmlega tuttugu árum síðar er Guðmundur kominn með handleggi og hafa framfarir hans farið langt fram úr björtustu vonum. Hér að neðan má sjá myndband sem Guðmundur Felix birti í morgun af sér svamlandi í sjónum: