Það er óhætt að segja að Árelíus Örn Þórðarson hafi hleypt illu blóði í leigjendur á Facebook. Nú síðdegis birti hann stutta færslu innan eins stærsta hóps Íslands, Leiga, og fullyrti að það hafi aldrei verið eins auðvelt að eignast íbúð. Á skömmum tíma hafa ríflega hundrað athugasemdir verið skrifaðar við færsluna og virðiast fæstir sammála Árelíusi.
Hann skrifar: „Ég vill leggja smá púkk í umræðuna um leigu og að eiga íbúð. Ég tel að aldrei hafi verið eins auðvelt að kaupa íbúð eins og í dag. Í gamla daga þurfti maður að eiga 35 prósent í útborgun fyrir síðustu aldarmót og verðbólga oft allt að 100 prósent. Málið var þá bara þannig að þú varst meira í vinnunni en heima hjá þér og börnin þekktu varla pabba sinn. Nú er svo komið sð ungt fólk vill ekki leggja vinnu á sig myrkrana á milli og er það skiljanlegt. Hvað skal þá gera?“
Líkt og fyrr segir þá hefur talsverður fjöldi svarað honum. „Það er ekki endilega útborgunin sem það strandar á. Heldur greiðslumatið og computer say no! Samt getur fólk greitt 300- 400.000 á mánuði í leigu en kemst bara ekki í gegnum greiðslumatið,“ skrifar til að mynda ein kona.
Önnur skrifar: „Líklega kostaði 3ja herbergja íbúð í gamla daga 3 ára útborguð árslaun ritara (viðmið). Núna kostar hún um 12 ára útborguð árslaun og að þurfa að greiða 15% útborgun eru þá um 2 ára laun. Epli og grjót í samanburði.“
Svo er einn maður sem segir einfaldlega: „Oft er betra að þegja en að blaðra um hluti sem maður greinilega hefur ekki hundsvit á.“