Fjörugar samræður hófust á milli hæstaréttarlögmannanna Brynjars Níelssonar og Sveins Andra Sveinssonar eftir að sá fyrrnefndi birti ummæli á Facebook-síðu sinni síðdegis í gær.
Í pistli sínum sagði hann að þjóðaríþrótt Íslendinga væri almennt fjas út af engu og önnur íþrótt, ásakanir um lögbrot annarra manna, hafi sótt mjög í sig veðrið að undanförnu.
Nefndi Brynjar máli sínu til stuðnings fréttaflutning af málefnum Samherja og ásakanir um að forsvarsmenn fyrirtækisins hafi staðið í lögbrotum og saknæmu misferli sem ekki hafi reynst vera fótur fyrir.
„Hafa þeir blaðamenn verið verðlaunaðir hvað eftir annað fyrir að fara með fleipur,“ sagði Brynjar meðal annars.
Sveinn Andri gerði athugasemd við orðalag Brynjars og velti því upp hvort aðstoðarmaður dómsmálaráðherra, sem Brynjar sannarlega er, ætti að tjá sig um sekt eða sakleysi manna í málum sem enn eru til rannsóknar.
Sveinn Andri vísaði í orð Brynjars úr pistlinum og sagði:
„„Í meira en áratug hafa nokkrir fjölmiðlar fullyrt að Samherji hafi staðið í ýmsum lögbrotum og saknæmu misferli, sem hingað til hefur ekki reynst fótur fyrir.“ Ertu nú alveg viss um? Og er ekki dálítið bratt að slík yfirlýsing komi frá aðstoðarmanni dómsmálaráðherra?“
Brynjar svaraði Sveini Andra og sagði:
„Nú, hvað varð um gjaldeyrisbrotin og Seðlabankamálið allt og peningaþvættið í Noregi og víðar? Það hefur ekkert með aðstoðarmann dómsmálaráðherra að gera að þau mál fóru eins og þau fóru.“
„Verra ef reyndir lögmenn taki þátt í slíku“
Sveinn Andri spurði Brynjar hvort hann væri ekki að gleyma mútugreiðslunum sem enn væru til rannsóknar. „Þess vegna sagði ég hingað til,“ svaraði Brynjar. Sveinn Andri sagði aftur á móti að orð hans mætti skilja sem yfirlýsingu um að ekkert sé hæft í ásökununum. Því var Brynjar ósammála:
„Nei, en það er almennt skynsamt og gott að menn fullyrtu ekki um saknæma háttsemi annarra áður en mál fá afgreiðslu í réttarvörslukerfinu. Að minnsta kosti kynni sér málin almennilega áður og hafi einhverja forsendur til að fullyrða um sök. Veit að það er ekki vinsælt núna en mér þætti verra ef reyndir lögmenn taki þátt í slíku,“ sagði Brynjar og beindi pillunni til Sveins Andra.
Sveinn Andri svaraði Brynjari fullum hálsi:
„Reyndur lögmaður eins og þú og atvinnustjórnmálamaður átt að vita að fulltrúi dómsmálaráðuneytisins á ekki mikið að vera að tjá sig um sekt eða sakleysi sakborninga í yfirstandandi rannsókn stofnana sem óbeint heyra undir ráðherra.“
„Ég hef áhyggju af þér“
Brynjar þvertók fyrir það að hann væri að tjá sig um sekt eða sakleysi manna heldur minna á málin sem lokið er í réttarvörslukerfinu og hvernig þau enduðu.
„Í öðru lagi er ég ekki fulltrúi dómsmálaráðuneytisins heldur pólitískur aðstoðarmaður ráðherra. Í þriðja lagi hef ég áhyggjur af þér en þær eru af ýmsum toga.“
Sveinn Andri benti Brynjari á að hann væri aðstoðarmaður ráðherra. „Punktur. Stundum þarf maður stöðu sinnar vegna að gæta að orðum sínum, þó að það sá gaman að gjamma. Það má hæglega skilja þessa færslu sem svo að þeir Samherjamenn sem séu saklausir af öllu sem áður hefur verið borið á þá.“
Samskipti þeirra Brynjars og Sveins Andra má sjá í heild sinni í færslu Brynjars hér að neðan.
