„Ég hef verið að velta fyrir mér hvert heimsmetið sé í samfelldu kvefi. Ég er búinn að vera með hnerra, hósta og stíflaða nös síðan í október,“ segir Brynjar Níelsson í nýrri færslu á samfélagsmiðlinum Facebook.
„Soffía sagði að það þyrfti mjög mikið kvef til að stífla nös í svona nefi. Áhugavert ef vinir mínir í læknastétt kæmu með innlegg um þetta hér á vegginn. Hvað sem því líður ætla ég að hafa samband við þá í heimsmetabók Guinnes,“ ritar hann og hugsar sér gott til glóðarinnar.
Brynjar hlustaði í Bítinu í morgun á markþjálfa og félagsráðgjafa kynna námskeið fyrir fólk með ADHD í nánum samböndum. Hann segir að þar hafi komið fram að skilnaðartíðni væri nefnilega hærri meðal fólks þar sem annað væri að glíma við athyglisbrest.
„Ég spurði Soffíu hvort ekki væri rétt að við skráðum okkur á námskeiðið áður en illa færi,“ segir Brynjar en viðbrögðin hafi verið vonbrigði.
„Hún benti mér á að það væri reginmunur á athyglisbresti og almennum sauðshætti. Þetta námskeið hentaði okkur því ekki.“