Menningarrýnirinn Egill Helgason gerir verðlag á kampavínsklúbbnum Crystal að umræðuefni í nýlegri færslu á samfélagsmiðlinum Facebook. „Ef þið hafið hugsað ykkur að skreppa á Crystal í Tryggvagötunni í kvöld þá er þetta verðlistinn. Það er hraðbanki í sama húsi,“ segir Egill í færslunni og birtir mynd af vínverðlista staðarins en þar er ódýrasti drykkurinn vínglas á sex þúsund krónur en dýrasti drykkurinn er flaska af „Crystal“ á 305 þúsund krónur.
Ýmiskonar fólk tjáir sig um færslu Egils og virðist fólk vera almennt séð ósátt við tilvist staðarins en kampavínsklúbbar hafi lengi verið sagðir vera skjól fyrir vændi.
„Þessi verðlagning er hreinasta sturlun! Fróðlegt væri að sjá myndir af gestunum,“ segir Valdemar Pálsson.
„Það sést hverjir drekka á Crystal…,“ grínast Halldór Árni Sveinsson.
„Kunna svo ekki einu sinni að stafsetja nöfnin rétt,“ segir Þorfinnur Ómarsson.
„Þær Lady’s sem þurfa að vinna þarna fá vonandi 70% af verðinu til sín. Staðurinn myndi samt græða. En líklega er það ekki raunin. Ég myndi borga mikið fyrir að drekka ekki Santero Moscato, sem kostar heilar 1.690 ISK í Vínbúðinni en 49.000 ISK sem dömudrykkur,“ segir Hrönn Kristinsdóttir.
Staðurinn hefur verið nokkuð umdeildur síðan hann opnaði á Tryggvagötu árið 2016 en hann var áður til húsa í Ármúla. Árið 2019 var starfsmaður staðarins rekinn eftir að starfsmaðurinn bauð upp á nektardans fyrir þáttagerðarmenn Kveiks sem voru að fjalla um vændi og eiturlyf á kampavínsklúbbum.
Hægt er að lesa alla færslu Egils og athugasemdir annara hér fyrir neðan