Á fjórða tug einstaklinga urðu veikir eftir að hafa borðað á Fabrikkunni undanfarna daga. María Rún Hafliðadóttir, framkvæmdastjóri Fabrikkunnar, segir að öllum verði endurgreitt.
Eins og Mannlíf greindi frá í gær varð fjölmennur hópur fólks veikur eftir að hafa borðað á Fabrikkunni seinustu helgi. Í dag var tala einstaklinga sem veiktust komin upp í að minnsta kosti 33. Í kjölfar fréttarinnar var staðnum í Kringlunni lokað á meðan Heilbrigðiseftirlitið kannaði málið. Líkur eru á að um Nóróvírus sé að ræða en Heilbrigðiseftirlitið á eftir að staðfesta það.
„Staðurinn opnar. Allt sótthreinsað hátt og lágt og starfsmenn hraustir sem eru mættir til vinnu og eldhúsið, búið að gera allar ráðstafanir þar,“ sagði María í samtali við Mannlíf um hvort stæði til að opna Fabrikkuna í Kringlunni í dag. María sagði einnig að Heilbrigðiseftirlitið hefði gefið grænt ljós á að opna aftur.
„Ég hef bara fengið eina ábendingu til mín frá Borgartúni en hún er frá því í vikunni áður. Þannig að þá vorum við eiginlega búin að útiloka það og Heilbrigðiseftirlitið líka. Það væri þá bara einhver ælupest að ganga innan fjölskyldna þeirra. En að sjálfsögðu fór Heilbrigðiseftirlitið líka niður í Borgartún og við erum að fara í þær aðgerðir að það sé ekki hægt að rekja neitt til okkar,“ sagði María um þá umræðu um að veikindin væru ekki einungis bundin við Fabrikkuna í Kringlunni heldur einnig staðinn í Borgartúninu.
„Ég bað fólk um að hinkra meðan ég væri að finna út úr þessu. Hvað þetta er og var. Að sjálfsögðu endurgreiðum við öllum sem hafa lent í þessu,“ svaraði María um hvernig að Fabrikkan ætlaði að tækla framhaldið.