Guðrún Aspelund sóttvarnalæknir segir að fjórir faraldrar séu nú í gangi í samfélaginu. Morgunblaðið ræddi við Guðrúnu sem greindi frá því að þrettán manns væru á spítala vegna kórónuveirunnar, þar af einn á gjörgæslu. Þá hafi tveir stofnar af inflúensu verið að plaga landsmenn en náði stofn A veirunnar toppi í lok síðasta árs. „B hefur núna verið að færa sig upp á skaftið. Það gerist stundum að það kemur annar toppur af B þannig að við höfum auga með því,“ sagði sóttvarnalæknir.
Auk inflúensunnar og kórónuveiru hefur fólk verið að veikjast alvarlega af streptókokkum og RS-veirunni. Líkt og Mannlíf greindi frá í síðustu viku hefur verið töluvert um innlagnir barna á spítala vegna sýkingarinnar. Dæmi eru um að fullorðnir hafi einnig verið lagðir inn á spítala, til dæmis þegar streptókokkasýking fer í brjósthol, vöðva eða blóð. „Það eru mjög alvarlegar sýkingar,“ segir Guðrún.