Gunnar Smári Egilsson vill leysa mengunarvanda höfuðborgarsvæðisins með frumlegum hætti.
Sósíalistaforinginn Gunnar Smári kom fram með nokkuð nýstárlega leið til að minnka mengun á höfuðborgarsvæðinu en hún hefur verið með hæsta móti undanfarna daga. Vill hann fylgja fordæmi nokkurra stórborga og skiptast á að leyfa bensín og dísilbílum með oddatölu aftast á númeraplötu sinni að keyra um borgina og svo bílum með sléttri tölu sem og einkanúmerum.
„Sumt reddast ekki bara af sjálfu sér. Við sumu þarf að bregðast. Þetta er eitt af því. Ein leið er að banna umferð bensín og dísilbíla með oddatölu aftast í númerinu einn daginn og þá sem eru með slétta tölu og einkanúmer hinn daginn. Það er gert í flestum borgum. Einkabílinn getur verið fínn, en hann er ekki þess virði að svipta fólk heilsunni,“ skrifar Gunnar Smári í færslu inni á hópi Sósíalistaflokksins á Facebook.
Þess ber að geta að sex borgir hafa notast við þessa aðferð, eftir því sem Mannlíf kemst næst en það eru stórborgirnar Peking í Kína, Dehli í Indlandi, París í Frakklandi, Mexíkóborg í Mexikó, Róm og Mílano í Ítalíu.