Drengirnir sem sagðir voru hafa tekið þátt í einhverskonar mönunarleik þar sem þeir áttu að biðja ókunnugt fólk í Hagkaupi í Skeifunni um far, segjast hafa verið að grínast.
Mannlíf sagði í dag frá færslu sem kona nokkur birti í Facebook-hópnum Góða systir þar sem hún sagðist hafa orðið vitni að tveimur tíu ára drengjum biðja ókunnuga um far heim til sín. Sagði hún að um einhversskonar leik væri um að ræða þar sem krakkar mani hvort annað upp í að þiggja far með ókunnugum, ellegar sæta refsingu í skólanum.
Sjá einnig: Börn mana hvort annað í hættulegum leik: „Vildi bara segja frá hér því þetta er bara stórhættulegt“
Drengirnir tveir sem um ræðir hringdu í blaðamann Mannlífs og vildu koma því á framfæri að þetta hafi bara verið grín. „Þetta var bara grín, þetta er ekkert TikTok leikur eða eitthvað svoleiðis, við myndum aldrei fara upp í bíl með ókunnugum!“