Illugi Jökulsson fjölmiðlamaður vandar Guðmundi Inga Guðbrandssyni, félagsmálaráðherra VG, ekki kveðjurnar á Facebook. Illugi segir hann hræsnara af versta tagi en Guðmundur fagnaði í gær niðurstöðu Héraðsdóms Reykjavíkur í máli Hussein Hussein, sem komst að þeirri niðurstöðu að brottvísun hans hafi verið ólögleg.
„Ég ætla að leyfa mér að fagna því að þetta sé niðurstaða héraðsdóms því mér finnst eðlilegt að tekið sé tillit til fötlunar fólks í málefnum umsækjenda um alþjóðlega vernd. Þegar við höfum öll haft tækifæri til þess að kynna okkur þennan dóm þá held ég að það verði áhugavert að sjá á hvaða málsatvikum dómurinn byggir sína niðurstöðu,“ sagði Guðmundur á þingi í gær.
Illugi hefur um þetta að segja: „Hve ömurlegur hræsnari getur einn maður verið!“ Þar vísar hann vafalaust til þess að brottvísunin var framkvæmd í nafni ríkisstjórnarinnar, sem Guðmundur styður og ver gegn falli.