„Sá frétt á DV í dag þar sem ýjað er að því að Edda Falak sé að svíkjast undan vegna þess að hún tók sér frí í janúar. Sem síðan var tekin upp af fleiri miðlum. Þetta er hluti af því áreiti sem hún þarf stöðugt að þola, þar sem fjölmiðlar leika sér að gera hana að viðfangsefni, þegar hún má ekki fara í frí eins og annað fólk án þess að það séu birtar um það neikvæðar fréttir í fjölmiðlum,“ skrifar Ingibjörg Dögg Kjartansdóttir á Facebook-færslu í gær.
Þá telur hún fæsta gera sér grein fyrir vinnunni, upplýsingaöflun og úrvinnslu gagna sem liggur á bak hverjum þætti. Hún segir Eddu stöðugt vinna að því að finna frásögnum þolanda réttan farveg og fyrir vikið hafi hún þurft að þola gríðarlegt áreiti og neikvæða umræðu um sig. „Svo þegar Edda tekur sér smá frí þá er því slegið upp eins og það sé skandall. Við ættum frekar að þakka fyrir allt sem hún hefur sett í þetta og sömuleiðis að hún hlúi aðeins að sér þegar á þarf að halda,“ skrifar Ingibjörg en færsluna má lesa í heild sinni hér að neðan.
