Karlmaður var dæmdur í 90 daga skilorðsbundið fangelsi í héraðsdómi Austurlands, fyrir árás á sambýliskonu sína. Skilyrði eru þó fyrir skilorðinu.
Fram kemur í dóminum að maðurinn hafi ráðist á konuna á heimili þeirra í sumar þar sem hann kýldi hana ítrekað í andlit, höfuð og líkama. Þá sparkaði hann í hana tók kverkataki en hún hlaut mar og bólgur fyrir vikið.
Fram kemur í frétt Austurfréttar að í niðurstöðum dómsins segi að háttsemin hafi verið alvarleg en að skýlaus játning og samvinna við rannsókn málsins hafi verið metin manninum til tekna. Maðurinn kallaði sjálfur lögreglu á vettvang þessa umræddu nótt. Þá hefur hann leitað sér sálfræðiaðstoðar síðustu mánuðina. Parið býr ennþá saman.
Refsingin hljóðar upp á 90 daga fangesli, skilorðsbundið til tveggja ára en skilorðið er háð skilyrðum. Er manninum skipaður umsjónarmaður af hálfu Fangelsismálastofnunar og er honum meðal annars skylt að hlíta fyrirmælum umsjónarmannsins. Þá þarf maðurinn einnig að sækja sálfræðitíma næsta árið.