Höfundur og flytjandi Þjóðhátíðarlags Vestmannaeyja þetta árið er söngkonan Klara Ósk Elíasdóttir eða Klara Elias. Klöru kannast eflaust margir við úr stúlknahljómsveitinni Nylon, sem skipti síðar um nafn og kallaði sig The Charlies. Þjóðhátíðarlagið hefur einu sinni áður verið samið og flutt af konu en sú fyrsta til var Ragga Gísla með lagið Sjáumst þar, árið 2017.
Klara hefur starfað sem söngkona síðan hún var í menntaskóla og var búsett um árabil í Los Angeles. „Ég samdi lagið með Ölmu Guðmundsdóttur og James Wong sá um upptökustjórn ásamt mér. Við tókum upp lagið í LA og ég kláraði upptökur hérna heima líka,“ sagði Klara í samtali við Vísi. Lagið heitir Eyjanótt og verður það gefið út þann 7.júní næstkomandi.