Ómar Ragnarsson segir orðræðuna á Alþingi um hið meinta málþóf Pírata vegna útlendingafrumvarps Dómsmálaráðherra, minna á orðræðuna er Sigmundur Davíð Gunnlaugsson fór ekki til Parísar í kjölfar hryðjuverka sem þar voru framin.
Í nýrri færslu á bloggsíðu sinni, skrifar skemmtikrafturinn og fyrrum fréttamaðurinn Ómar Ragnarsson, færslu við frétt Mbl.is um orðræðu Sigmundar Davíðs Gunnlaugssonar á Alþingi í gær. Segir Ómar að þetta minni á það þegar Sigmundur, sem þá var forsætisráðherra, neitaði fyrir átta árum að fara til Parísar eins og margir aðrir þjóðarleiðtogar gerðu, til að votta Frökkum samúð vegna hryðjuverka sem þar voru nýafstaðin. Birti Ómar svo frumsamda vísu sem hann samdi fyrir átta árum. Færsluna má lesa hér að neðan:
„Minnir á orðræðuna þegar Sigmundur fór ekki til Parísar.
Yfirbragðið á umræðunni í Alþingi, sem greint er frá í viðtengdri frétt á mbl.is, um viðveru eða öllu heldur fjarveru ríkisstjórnarinnar, minnir dálítið á það, þegar þjóðarleiðtogar heims flykktust til Parísar fyrir átta árum til þess að sýna Frökkum samhug eftir mikil hryðjuverk í París í höfuðstöðvum blaðsins Charlie Hebdu.
Íslendingum stóð til boða að senda okkar mann, en þáverandi forsætisráðherra, Sigmundur Davíð Gunnlaugsson, sá sér ekki fært að fara og bar við tímaskorti, enda ómissandi og önnum kafinn hér heima.
Þá varð þessi vísa til:
Forystu Íslands féllust hendur;
til Frakklandi var því enginn sendur.
Héðan fór enginn yfir hafið,
því enginn er betri´en Sigmundur Davíð.“