Fáir hlutir hafa valdið jafn miklu uppnámi í samfélaginu það sem af er ári og bindandi kauptilboð sem Landsbankinn gerði í tryggingarfélagið TM fyrr í mánuðinum. Margir hafa gagnrýnt tilboðið harkalega og er Þórdís Kolbrún R. Gylfadóttir fjármálaráðherra einn af þeim gagnrýnendum en hún telur ekki rétt að banki sem er í ríkiseigu sé að kaupa tryggingarfélag.
Lilja Björk Einarsdóttir, bankastjóri Landsbankans, hefur reynt að tala sig í kringum vandamálið sem bankinn hefur bakað með þessum kaupum og heldur því fram að Landsbankinn sé ekki ríkisfyrirtæki.
„Það er mikilvægt að hafa í huga að Landsbankinn er ekki ríkisfyrirtæki. Landsbankinn er almenningshlutafélag í eigu ríkisins og starfar á samkeppnismarkaði. Við verðum því að huga að því að viðhalda og auka verðmæti félagsins fyrir hluthafa. Út frá þeim sjónarmiðum erum við að ráðast í þessi kaup,“ lét Lilja Björk hafa eftir sér en íslenska ríkið á rúmlega 98% hlut í bankanum.
Mannlíf sendi fyrirspurn á Landsbankann og bað um að fá afrit af kauptilboði bankans á grundvelli upplýsingalaga.
„Landsbankinn er undanþeginn upplýsingalögum,“ var svar Rúnars Pálmasonar, upplýsingafulltrúa Landsbankans, við fyrirspurninni en í lögum um upplýsingalög er að finna nokkrar utantekningar og á það við í tilfelli Landsbankans.