„Það er auðvitað ótti í manni,“ segir Guðmundur Víðir Magnússon, sauðfjárbóndi á Efri-Torfustöðum. Bærinn er staðsettur í Miðfirði, mitt á milli bæjanna tveggja sem upp hefur komið riða í sauðfé. Guðmundur segist ekkert hafa fundað með öðrum bændum á svæðinu, enda hafi hann legið inni á spítala með Covid og lungnabólgu. „Ég er enn slappur en er aðeins farinn að fara út og gefa fénu.“
Hátt í 700 kindur hafa verið aflífaðar á bænum Bergsstöðum í framhaldi þess að riða greindist þar. Nokkrum dögum síðar kom upp riðutilfelli á Syðri-Urriðaá. Í dag var skorið niður þar yfir 600 fjár. Fullkomin óvissa er um það hvort riða leynist víðar í Miðfirði. Íbúar eru harmi lostnir vegna ástandsins.
Bændur á svæðinu skoruðu á stjórnvöld að leita aðra leiða en að aflífa kindurnar en Svandís Svavarsdóttir, matvælaráðherra segir niðurskurð vera það eina í stöðunni í þessu tilviki.