Sjónvarpsstöðin N4 hefur óskað eftir gjaldþrotaskiptum. Greint er frá þessu á vef og Facebook síðu þeirra.
„N4 ehf. hefur óskað eftir gjaldþrotaskiptum eftir að tilraunir til að tryggja framtíð fyrirtækisins báru ekki árangur.
N4 hefur framleitt íslenskt efni undanfarin 15 ár. Fólkið í landinu hefur verið í brennidepli í allri framleiðslu efnis. N4 hefur varðveitt sögu þjóðarinnar. Þessum kafla í sögu fjölmiðla á Íslandi er lokið að sinni.
Rekstur fjölmiðils eins og N4 hefur byggt á óeigingjörnu starfi starfsfólks í sífellt erfiðara rekstrarumhverfi fjölmiðla á Íslandi. Fyrir það á starfsfólkið mikið hrós skilið.
Stjórn fyrirtækisins harmar þessa niðurstöðu, ekki síst í ljósi þess að N4 hefur verið leiðandi fjölmiðill í framleiðslu á íslensku sjónvarpsefni utan höfuðborgarsvæðisins.“
„Tilraunir til að tryggja framtíð fyrirtækisins báru ekki árangur“