Jóna Katrín Hilmarsdóttir, skólameistari við Menntaskólann að Laugarvatni, hefur áhyggjur af orðræðu í samfélaginu en í gær var greint frá því að Helgi Helgason, kennari við skólann, hafi kallað tónlistarmanninn Bashar Murad „grenjandi og illa skeindann Palestínuaraba,“ ásamt fleiri rasískum ummælum. Óhætt er að segja viðbrögðin hjá almenningi hafi verið sterk og fylltist pósthólf Jónu fljótt af tölvupóstum um málið. Í dag var svo greint frá því að samið hafi verið við Helga um starfslok og mun hann ekki kenna aftur við skólann.
Helgi birti ummæli sín í Facebook-hópnum „Íslenska þjóðfylkingin“ en Jóna segist ekki sjálf hafa séð ummælin í hópnum enda sé hún ekki meðlimur þar.
„Ég held samt að nemendur séu duglegri að spotta og fylgjast með. Þannig þau virðast hafa verið með puttann á púlsinum þarna,“ sagði Jóna Katrín í samtali við mbl.is um málið.
„Það sem mér sýnist á því sem ég er að skoða þarna núna aftur í tímann er að eins og í samfélaginu öllu og á samfélagsmiðlum sérstaklega, er að færast snarlega töluverð harka í orðræðu. Ég er persónulega mjög uggandi yfir því.“