Samkvæmt tölvupósti frá skólastjóra Gerðaskóla í Reykjanesbæ, sem sendur var á foreldra og Mannlíf hefur undir höndum, kom nýlega upp alvarlegt mál í sjötta og sjöunda bekk skólans þar sem farið var yfir mörk eins nemandans. Foreldrar, sem Mannlíf ræddi við, eru sumir hneykslaðir á viðbrögðum skólayfirvalda.
Málið varðar brot nokkurra barna í bekknum gegn einu barni en ekki kemur fram í póstinum í hvaða bekk það barn er. Segist skólastjórinn, Eva Björk Sveinsdóttir, í tölvupóstinum, sem hefur heitið Óæskileg hegðun, hafa fengið ábendingu um það að fleiri en tvö börn í sjötta og sjöunda bekk hafi sett fingur í rass á einu barni og því hafi hún farið í bekkina og rætt málið þar. Brýndi hún fyrir foreldrum að ræða þetta við börn sín.
Foreldri barns í öðrum bekknum, ræddi við Mannlíf og er afar ósátt. „Það sem mér blöskrar mest í þessu er hvað lítið var gert úr þessu, þetta er svo mikið meira en bara óæskileg hegðun,“ sagði foreldrið og bætti við að tölvupósturinn minnti helst á það þegar lús finnst í bekknum, alvarleikinn væri ekki metinn meiri.
Mannlíf heyrði í Evu Björk, skólastjóra Gerðaskóla og vildi meðal annars vita hvort barnið sem brotið var á hefði fengið viðeigandi aðstoð og af hverju pósturinn hafi hljómað sakleysislega. „Já, nei, nei, þetta var ekki svona,“ svaraði Eva Björk, afsakaði sig, og sagðist vera á leið í flug og sleit samtalinu.