Páskaveðrið hefur leikið marga grátt undanfarna daga og hafa Seyðfirðingar verið ofarlega á þeim lista en þeir hafa verið innilokaðir í rúma þrjá sólarhringa. Fjarðarheiði, eina landleiðin til og frá bænum, hefur verið lokuð á þeim tíma en til stendur að vegurinn verði mokaður í dag.
Seyðfirðingurinn Jón Halldór Guðmundsson sagði í samtali við RÚV að ástandið væri byrjað að hafa áhrif á bæinn. „Fólk sem er í vaktavinnu í álverinu til dæmis, það hefur ekki komist í vinnu, og fleiri vinnustöðum. Og vöruskortur er töluverður í búðinni. Það er ýmislegt sem gerist í þessu,“ sagði Jón um málið.
„Það er að ganga niður veðrið á heiðinni. Það er fullt af fólki sem hefur verið hér um páskana í nokkra daga og vona að heiðin opni seinna í dag.“
Fólk hefur verið beðið að fara gætilega og vera ekki að ferðast án þess að hafa ríka ástæðu til en mikil hætta er talin á snjóflóðum á Austfjörðum og á Vestfjörðum á næstu dögum.