Hægri öfgaflokkur Geert Wilders fór með sigur úr býtum í þingkosningunum í Hollandi en Kristinn Hrafnsson telur tímabært að tala um uppgang fasista í Evrópu.
Ritstjóri Wikileaks, Kristinn Hrafnsson skrifaði færslu í gær þegar ljóst þótti að hægri öfgaflokkur Geert Wilders, Frelsisflokkurinn, myndi vinna sigur í þinkosningunum í Hollandi. Hlaut flokkurinn 37 sæti af 150 en næstu tveir flokkar náðu 24 og 25 þingsætum. „France 24 segir réttilega að þessi kosningasigur muni valda skjálfta ekki bara í Hollandi heldur í öðrum löndum Evrópu,“ skrifaði Kristinn og hélt áfram. „Hamingjuóskir hafa streymt inn frá öðrum öfgahægriflokkum sem telja þetta merki um breytt landslag í Evrópskri pólitík.“ Lokaorð Kristins eru nokkuð óhugnanleg, fyrir þá lesendur sem ekki aðhyllast fasisma. „Ef til vill tímabært að fara að tala um uppgang fasískra tilhneiginga af alvöru í stað þess að líta á þetta sem léttvægt ónæði sem hljóti að fjara út af sjálfu sér.“