Í vikunni hafa þyrluáhafnir Landhelgisgæslunnar hlotið svokallaða HUET-þjálfun sem fram fara í Rotterdam í Hollandi.
Á vef Gæslunnar segir að allar þyrluáhafnir Landhelgisgæslunnar verði að gangast undir svokallaða HUET-þjálfun með reglulegu millibili og á það jafnt við um flugmenn, sigmenn, spilmenn og lækna. Markmið þjálfunarinnar er að allir um borð séu undir það búnir að geta komist úr þyrlu sem þarf að lenda í sjó eða á vatni.
Er þjálfunin bæði bókleg og verkleg en í verklega þættinum kemur áhöfnin sér fyrir í þyrlulíkani sem er síðan slakað niður í sundlaug. Fyrst er þetta gert rólega, svo er hraðinn aukinn, því næst er líkaninu velt og í síðustu ferðinni er æfingin gerð í svartamyrkri. Allt er þetta gert til að líkja eftir sem raunverulegustum aðstæðum.
Sjá má brot af æfingum Gæslunnar hér.