Hannes Hólmsteinn Gissurarson segir að tími sé kominn til að fólkið í landinu taki lögin í eigin hendur gagnvart hælisleitendum.
Sjá einnig: Hannes Hólmsteinn sakaði múslíma um þjófnað í Leifsstöð: „Þú öskraðir á tvær litlar stelpur“
Stjórnmálaprófessorinn á eftirlaunum og ritgerðasmiður fyrir The Conservative, Hannes Hólmsteinn Gissurarson skrifaði Facebook-færslu við frétt DV um erlendan síbrotamann sem hefur haft í hótunum við vararíkissaksóknara en er nú í gæsluvarðhaldi. Hannes segir að stjórnvöld verði að grípa í taumana og vísa manninum úr landi. Hannes telur svo upp fleiri sem hann telji að þurfi að vísa úr landi. Að lokum segir hann að það sé kominn tími fyrir fólkið í landinu til að taka lögin í sínar hendur, bregðist stjórnvöld.
„Þetta nær ekki nokkurri átt. Stjórnvöld verða að grípa í taumana. Það ber ekki aðeins að vísa þessum manni tafarlaust úr landi, heldur líka konunum þremur, sem veittust að Bjarna Benediktssyni á dögunum, og mönnunum þremur, sem trufluðu fund Alþingis með háreysti, jafnframt því sem einn þeirra reyndi að stökkva niður í fundarsalinn. Þetta fólk á allt að senda burt. Það er kominn tími til, að fólkið í landinu grípi til sinna ráða, ef stjórnvöld bregðast og halda ekki uppi lögum og reglu.“