Söngkonan frábæra Jóhanna Guðrún Jónsdóttir segir frá því í viðtali við Fréttablaðið hvernig hún og maður hennar, Ólafur Friðrik Ólafsson, fundu ástina á ný eftir langan viðskilnað.
Komið hefur fram að Jóhanna og Ólafur tóku saman fyrir tveimur árum; það voru ekki þeirra fyrstu kynni; þau voru par á yngri árum, frá 2008 til 2010:
„Við höfðum ekkert talað saman í öll þessi ár. Við vorum búin að fara út í lífið og gera alls konar hluti sitt í hvoru lagi en ekkert búin að mætast. Ég rakst svo á hann eftir að ég skildi.“
Hún bætir þessu við:
„Ég upplifði það sem þessa ákveðnu stýringu, ég átti bara að hitta þennan mann. Þetta var alls ekki planið mitt; ég ætlaði bara að skapa mér líf með börnunum mínum tveimur.
Ég ætlaði að prófa það í einhver ár svo þetta var alveg u-beygja. Það var heldur ekkert planað að eignast barn svo snemma en hún er náttúrlega fullkomin og við gætum ekki verið glaðari með hana. Hún er algjört ljós í lífi allra í kring.“