Kári Stefánsson, forstjóri Íslenskrar erfðagreiningar, segir að töluverðar takmarkanir þurfi að koma til strax því kórónuveirufaraldurinn sé farinn gjörsamlega úr böndunum. Eitt af því sem hann vill fá í gang er bólusetning íslenskra barna.
Kári segir ljóst að ef aðeins verði brugðist við nýjustu bylgjunni með hálfkáki komi faraldurinn til með að rústa atvinnulífi landsins og gera út um jólahátíðina. Þriðja daginn í röð var met slegið í fjölda greindra hér á landi þar sem tvö hundruð greindust með veiruna.
„Þetta er farið gjörsamlega úr böndum og nú verðum við að setja töluverðar takmarkanir á hegðun fólks til þess að ná þessu „under control“. Við kunnum að gera það. Við getum gert það og í þetta skipti þá held ég að það eigi ekki að þurfa að endast lengi. Þannig að nú þurfum við bara að gefa í hvað bólusetningu snertir. Bólusetja börnin. Bólusetja aukaskammt í alla fullorðna. Við þurfum að herða takmarkanir á landamærum eða að minnsta kosti sjá til þess að það sé ekki stöðugt streymi á veirunni inn í landið,“ sagði Kári ákveðinn í samtali við Vísi.
„Við þurfum að gera er að hætta að nota hraðpróf og fara að nota PCR prófin þessi næmustu próf. Vegna þess að við erum að greina fólk of seint. Ef við bíðum mikið með þetta, ef við bregðumst ekki við hratt, þá kemur þessi til með að ríða röftum yfir hátíðirnar. Koma til með að rústa atvinnulífi landsins í náinni framtíð. Þannig það er eins gott að bregðast við þessu skynsamlega. Ekki fara að ráðast í þetta með hálfkáki.“