Katrín Jakobsdóttir forsætisráðherra er enn tvístígandi varðandi framboð til embættis forseta Íslands. Mikið gengur á að tjaldabaki þar sem forsætisráðherrann reynir að tryggja sem mesta sátt um brotthvarf sitt. Í þeim efnum þarf hún að horfa til samstarfsflokkanna og inn á við í eigin flokki sem mælist með fylgi við dauðamörk. Þeir sem Mannlíf hefur rætt við telja líklegra en ekki að hún taki stökkið og gefi kost á sér sem forseti Íslands. Hernt er að henni sárlangi í embættið.
Í gærkvöld upplýsti Jón Gnarr að hann færi í framboð. Það þótti fréttnæmt að hann var tveimur mínútum fljótari að safna meðmælendum en Baldur Þórhallsson prófessor sem mælist með langmest fylgi frambjóðenda. Steinunn Ólína Þorsteinsdóttir athafnakona hefur upplýst að hún muni fara í framboð ef Katrín gefi kost á sér. Steinunn Ólína er þegar farin að safna meðmælendum.
Uppnám er á stjórnarheimilinu vegna þreifinga Katrínar. Þar liggur í loftinu að Vinstri- grænir verði að sleppa forsætisráðuneytinu
ef Katrín fari í forsetaframboð. Nær útilokað er að VG fallist á að Sjálfstæðisflokkurinn fá embættið og ekki er líklegt að sátt verði um að Svandís Svavarsdóttir taki við af Katrínu. Líklegast er að Sigurður Ingi Jóhannsson verði forsætisráðherra, ef til kemur.
Allra augu hvíla nú á Katrínu og þess er beðið að hún taki af skarið.