- Auglýsing -
Þyrla á vegum Landhelgisgæslunnar sótti í gær veikan skipverja í kanadísku herskipi austan af landinu, nánar tiltekið rúmar tuttugu sjómílur austur af Vattarnesi.
Á heimasíðu Landhelgisgæslunnar segir að skipið hafi verið í hefðbundinni siglingu austur af landinu þegar stjórnstöð gæslunnar barst beiðni um aðstoð vegna veiks skipverja.
Sjúklingurinn var hífður um borð þegar skipið var um 5 sjómílur undan landi. Aðstæður til hífinga voru nokkuð strembnar.
Mikil þoka var á svæðinu og skyggni því lélegt en hífingarnar tókust með hreinum ágætum enda vanir menn þarna á ferð og var skipverjinn fluttur undir læknishendur í Reykjavík.