Ný könnun Prósents sýnir að um fjórðungur landsmanna býst við verri fjárhagslegri stöðu heimilisins árið 2023 saman borið við það síðasta. Þá telja 33 prósent fjárhaginn verða betri á nýju ári en flestir búast við að staða þeirra verði óbreytt, eða 43 prósent.
Sex prósent eru afar bjartsýnir og telja fjárhag á nýju ári verða miklu betri en á því síðasta en önnur sex prósent telja fjárhagsstöðu verða miklu verri. Fréttablaðið fjallaði um málið í dag en samkvæmt niðurstöðu úr annarri sambærilegri könnun á vegum Prósents má ætla að fjárhagsörðuleikar heimilanna hafi aukist töluvert frá því í ágúst. Aldur virðist spila inn í von um betri fjárhag en fimmtíu prósent fólks á aldrinum 25 til 34 ára býst við betri fjárhag á nýju ári. Hjá þeim sem eru 65 ára og eldri búast aðeins ellefu prósent við því sama. Aðeins 23 prósent Sjálfstæðismanna eiga í erfiðleikum með að ná endum saman, samanborið við 63 prósent kjósenda Flokks fólksins og Sósíalistaflokksins. Bjartsýnastir eru Píratar en tæplega 50 prósent þeirra telja að árið 2023 verði fjárhagslegra betra.