Eigendur Veiðihornsins, hjónin María Anna Clausen og Ólafur Vigfússon, þurftu að standa í 14 klukkustunda eltileik við hreindýratarf um helgina. Á endanum náðu þau dýrinu og skutu annan tarf til viðbótar á sama svæði.
Síðastliðinn fimmtudag hófst veiði á hreindýrstörfum og fóru því hjónin austur á land í leit að dýrum. Í samstali við Morgunblaðið var Ólafur afar sáttur með þennan fyrsta veiðitúr. „Við vorum heppin að ná tveimur törfum á svæði 2.“
Ólafur segir veiðina hafa tekið sinn tíma og mikið þolinmæðisverk að elta dýrin uppi. Það er mat Ólafs að sökum mikilla hlýinda á Austurlandi síðustu daga og vikur séu dýrin hærra uppi í fjöllunum en venjulega. Því þurfi að hafa mikið fyrir því að elta þau uppi og finna. „Svo loks þegar við fundum dýrin þá voru þau mjög kvik og gjörn á að hlaupa á brott, þetta var því mikið þolinmæðisverk. Það verður að tryggja að maður fái gott færi til þess að ná að fella dýrið.“